telbana4all
السلام عليكم ورحمة الله
اهلا ومرحبا بك فى منتدى تلبانة للجميع
اذا كنت مشتركا بالمنتدى الرجاء ادخال بياناتك
والتعريف عن نفسك
اما اذا كنت زائرا فندعوك للأنضمام الى اسرة منتدانا

(ادارة المنتدى)



telbana4all


 
الرئيسيةالبوابةاليوميةس .و .جبحـثالأعضاءالمجموعاتتلبانه للجميع على الفيس بوكالتسجيلدخول

شاطر | 
 

 هو مين دول اللي زي بعض ؟؟!!

اذهب الى الأسفل 
كاتب الموضوعرسالة
مصعب الخير
مشرف قسم انتخابات مصر الثورة
مشرف قسم انتخابات مصر الثورة
avatar

تاريخ التسجيل : 07/03/2011
عدد المساهمات : 3089
الجنس : ذكر
التقييم : 12
العمر : 31
الأوسمة : :

مُساهمةموضوع: هو مين دول اللي زي بعض ؟؟!!   الأحد مايو 27, 2012 11:38 pm

تردد كثيراً بعد الجولة الأولي من الإنتخابات أن مرسي وشفيق مثل بعض
فهل لنا من عقول تحكم وتميز ،، فأري الإختلاف بينهم كما بين السماء والأرض



بقلم : د. نهى سلامة

ياااانهار يا جدعان ..

مرشح الأخوان و مرشح الحزب الوطني ؟؟ ..وعجبي عليك يا زمن

..دعني انعش الذاكرة قليلا و اعتذر للقارئ و المشاهد و اتمنى ان يمتنع الأطفال عن القراءة ..

انا شايفه فعلا انهم زي بعض ...و رأيي كمان انك ممكن تنتخب مرشحهم او تقاطع و ترجعلنا كدا , الله يخليك, الأيام الجميلة الي الظاهر أن أحنا نسيناها ...ثبتهالنا العمر كله أقصد ,لأن لسه بنبتدي معاها المشوار .....افتكر بس لما حد يسألك تقوله انت انتخبته ليه او قاطعت ليه .. و كمان حضر نفسك في كام برقية عشان تبقى في "الزيف سايد" ....

قل باعلى صوتك وسمعني : اني استخرت الله و انتخبت ...

انتخبت طابور العيش و نسيت الناس الي اتقتلوا عشان لقمتة...و انتخبت البلطجية الي بيلموا الدقيق من طحانينه الغلابة كل صباح إتاوة, و يضطروا آسفين يستجيبوا عشان يعرفوا يعيشوا و يرجعوا لعيالهم سلام .

انتخبت الأوراق المتلتلة الي بيطلبوها مني كل ما ادخل مؤسسة حكومية ..انتخبت ابتسامة الراجل الساخرة و هو بيستسهل انه يقولي في الآخر : مش هينفع .

انتخبت التزوير الفاضح الي استهتر بيه و بكياني ,مش كمصري ..كإنسان ..و ماتنساش تبعت برقية للناس الي كانت بتموت كل سنة في عرس الانتخابات ...

انتخبت الذل و العار و كرامة الإنسان المهدرة في الأقسام و المعتقلات ..و ماتنساش تبعت برقية أسف لأخويا ابن الناس الي راح القسم و اضرب الف الم و الم على وشه و قفاه و" انكسرت " رجولته و قوله : "الي انكسر ممكن يتصلح ياخويا "

و انتخبت عجرفة الشرطة في الشوارع و إتاوتها ..و إيديهم الي شغالة الله ينور بالصفع ع الوجوه ..ايش عرفك.. مش يمكن شرطة الأخوان تعمل نفس الشئ ؟؟..."الألم" الي تعرفه أحسن من الي ماتعرفوش ..وبعدين ياما الإخوان ,جماعة العنف, ضربوا و طاحوا لما كانوا ماسكيين الاتحادات و النقابات سنيييين و سنييين ..

و ياريت برقية رمزية ,لأنك مش هتعرف تعد ..للست و أولادها الي كانوا قاعدين جنب أبوهم منتظرينه يموت عشان الدور لسه ماجاش عليه في غسيل الكلى.

او الأب الي شايل ابنه وهو مش قادر ..وواقف ف الطابور يمكن يعالجولوا ابنه الي عنده القلب ...و ابقى وصي شفق يدعم أدوية القلب لأنه غالي اوي و ناس كتيييير ماتت في عششها عشان مش عارفه تجيبه ..ناس مش عارف عنها غير ربنا المنتقم ...يعني كان الريس وأعوانه هيعرفوا ازاي و هما في عشه ؟؟؟؟؟ ..مش يبانوا كدا

انتخبت الي عامل ميزانية الصحة ربع ميزانية الاعلام عشان يروج لنفسه ...نثق طبعا في شفيق و تاريخه انه مش هيعمل كدا ..لما تتزنق ارجع للتاريخ علطول

و ياريتي اقدر اقابلها تاني الست الي دخل ابنها المستشفى على رجليه و طلع على النعش.. عشان حقنة غلط ..وهددها الدكتور اما تمضى يا ماما انه دخل ميت ..اما ادخله المشرحة .. وصوتت : "مشرحة لأه, أبوس رجليك "...و اتذلت و مضت .

و انتخبت عشان الست الي بتحط المكرونة ف العيش عشان ولادها يشبعوا ..او تكدب عليهم ان فيه أكل لغاية مايناموا ..انتخبت عشان تقدر تاكل المكرونة بره العيش.

زمان كانوا بيقولوا أن مفيش حد بيموت من الجوع ..أسطورة, حطمها الحزب البائد ..

أنا مش عارفه شفق ماله ؟؟..الراجل كان موظف غلبان ..بيقبض آخر الشهر ...نكمل أحسن ..

و انتخبت عشان راجل البيت الي بيدخل ببطيختة الوحيدة اول يوم ف الشهر.. يفضل يدخل بالبطيخة حتى و لو قبض 220 جنية ..و ع الماشي كدا برقية كمان عشان ابويا الي انتحر لأنه مش عارف يجيب فلوس لبس المدارس .

و انتخبت عشان طفل الشارع يفضل يتفسح في الشارع و يقطع قلبي و هو نايم تحت المقطورة, و ماتنساش تبعت برقية كمان عشان تبقى في السليم ,للعيال الي ماتوا عشان المقطورة تحركت .

و هو يعني مال اهل الحزب الوطني بالسواق الحمار ..

كانوا خدوا فلوس البلد و نهبونا و سرقونا و ذلونا ادام عنينا؟؟ و انت مخروووس عامل نفسك مش شايف ..عشان خايف.. تتاكل الم ادام اولادك ؟؟كانوا عملوا كدا يعني؟؟ ...كانوا استحلوا فلوسنا و اعرضنا و نومنا و اكلنا و شربنا و عربياتنا ف المواقف ؟؟الباركينج يعني .. آه يا بلد

و ماتنساش تبعتلي برقية آسف لما اخدوا زوجي من حضن ولاده الساعة 3 الصبح عشان كان عمل توكيل شهامة لصاحبه الأخواني ف اللجنة ..من عشر سنين قبلها ..يعني كتر خيرهم استنوا عليه الرجاله عشر سنين .. وماتنساش تبعت برقية للراجل بتاع الكبدة الي كان قاعد معاه في السجن ..و خدوه و جرجروه ادام ابنه عشان يكملوا عدد المعتقلين المطلوب.

و انتخبت كل انواع الخمور و الحشيش ..اصله زرع عادي ..و الأفيون و الكواكين و الأقراص المبرشمة الي كل يوم بتدخل لأرض بلدي عشان تبوظ بمنهجية ابن بلدي ..و عشان كمان المدرس يفضل يبعها لهم و يسترزق.

و انتخبت عشان افلام العري و الشذوذ الي بتدخل الرقابة تطلع ببركتها و زيادة شوية ..انتخبت عشان الحرية قصدي يعني.

بس فهميني شفق ماله ؟؟ لما تتزنق ارجع للتاريخ علطوول ..راجل فله .. جيبة فلة ...و ايده فلة ...و اسألوا برسيل

و انتخبت عشان البلطجية الي بيسرقوا عربيتك و تفضل تحفى وراهم عشان يرجعوهالك, و تدفع عليها فلوس كمان عشان تاخدها تاني...أصل عقبال أمالتك خط السير معروف ..للمواطن طبعا, مش الشرطة.

و انتخبت السنج و المطاوي و السفوريا الي مع شبابنا ...آه يا شباينا ...و الله ينور عليك ..خبرات لا حصر لها هتعدي عليها ,يعني هتعدي, لو دخلت مدارس الحاكومة ..و هتعدي عليها من تحت لتحت ف المدارس الخاصة ..

و انتخبت المعلم .." وفه التبجيلا" الي قلع البنت البنطلون ادام العيال و ضربها بوحشية عشان ماجبتش فلوس الدرس ..ولو عايز تبعت برقية ابقى قولي اصلي عارفاها.

و انتخبت المناهج الغبية الي بندرسها ..و انتخبت الدروس الخصوصية ..

و انتخبت الأمريكاااان و ما ادراك ما الأمريكان .

و الغاز المصري عشان يتصدر تاني لاسرائيل ..قفلوا علينا ولاد الايه باب خير برضو .

و انتخبت ..وقولها بحرقة احسن تعبااانه ...القمح الي ضاع عشان استورد الأمريكي ..والفلاح الي اتشرد بنظمه و قوانينه ...و الأكل المسرطن الي ممكن لو عايز احكي لك عليه للصبح, اصلي بتاعت علوم و قريبه من الزراعة J..و انتخبت الاعارات الي عارفه اصلها و فصلها الي كانت بتودي شبابنا بالهبل لاسرائيل ..المهندسين الزراعين عشان ياخدوا الايدز و يجوا ...عارفه واحد شافهم على الشط ...مع الاعتذار للمشاهد.

و انتخبت أصدقاء بشااار ...من اجل استكمال مسيرة السياسة الخارجية للوطن ..ولله حموا حدودنا و عز بنى جدار فولاذي بينا و بين الفلسطنيين الوحشين ,الي عايزين يكلوا و يشربوا و يعيشوا ...منتهى الوطنية و الحماية الرائعة للحدود

و انتخبت الحزب الي قتل اخوانا المسيحين في كنيسة القديسين ..و قطع أجسادهم حتت بلبسهم الجديد بتاع العيد ..انتخبت عيالهم الي ماتوا او اتشردوا و البيوت الي اتخربت.

بس كمان عشان تبقى ف السليم و يقولوا عليك بتاع قبول آخر و كدا ..لازم تبعت..... معلش يعني ...لازم تبعت برقية للاخوان الي كانوا بيقولوا عليهم مجانين ايام ما كانوا بيقولوا لأ ...فدخلوا السجون يالسنييين وحاربوهم في صحتهم و رزقهم..مع احترامك لكل خلافتهم معاهم

و انتخبت الخصخصة ..و الصفقات الي بيختار اغلاها المسؤول عشان يدخله برضو شوية فلوس زيادة ..

و انتخبت التهميش والتجاهل لذوي الاحتياجات ...بتشوف حد ماشي فيهم ف الشارع ؟؟, بتعرف ليلهم بيعدي ازاي؟؟ ..و فلوسهم جايه منين ..؟؟؟

و انتخبت الشباب الي قاعد ع القهاوي مش لاقي شغل بس لاقي بانجو ... و قلب امه الي يتقطع و هوه متستت جنبها.

و انتخبت الشباب الي شفتهم بعيني جنبي سايقيين و ف ايديهم البانجو ...حتى البانجو سهل و خفيف يعني.

و انتخبت عشان وحشني اوي اوي المناظر بتاعت مجلس الشعب الي فات ..اشي نايم و اشي مبرشم و اشي بيرفع ايده و هو مش عارف ليه ...بدل يا عم الاخوان و اداءهم في البرلمان ...خدوا فرصتهم .. واخدين المباني جاهزة و البلد جاهزة مادفعوش عليها مليم ..كفاية بقه كدا

و انتخبت الي هيطلع حسنى مبارك, مثله الأعلى, من السجن ...الراجل صراحة اتسجن بفلوسه الي مانعرفش عنها حاجه ..انتخبت عشان يخرجه , هوه و عياله و اعوانه, ويدخلني انا و انت و الأخوان مكانهم, هنتقابل هنتقابل ...اصل الأخوان وحشين و غلطوا و قالوا مش هينزلوا ريس و نزلوا.

و انتخبت بأعلى صوتي سوزان مبارك ..الست الي كانت مقرطسانا و مقرطاسه الرجالة..و عايزه الواد يبقى مطرح ابوه ..والي ما زالت طليقة ..

و انتخبت الحرامي الي بوظ شركتي العريقة مصر للطيران و الي نهب و الي سرق و الي ظلم و طلعها مديونة ..و الي كان شعاره جوه " انا صايع " ..و ماتنساش تبعت برقية لأمي ..اصلها كانت مدير عام في الشركة وقت سيادته ما كان ريسها.

و انتخبت الراجل الشعبي الي قرر يرفع مستوى الشعب و رفع سعر الصوت من الف الي الفين و 500 ...وطنية

و انتخبت حكومة موقعة الجمل ..و الشهداء بتوعها معروفين ..من اول الي ماتوا من قناصة الفجر الي اخر اليوم ..يعني الراجل كان هيعمل ايه في رجال اعمال باعوا البلاد و اشتروا الجمال ..و مين قال أنه متواطأ..و هوه شايف الثورة انتهت بانتخابه.

مش دايما باقولك : لما تتزنق أرجع للتاريخ علطول.

و انتخبت الشرطة السرية ...سرية مابقولك ..كان هيعرف عنها فين الراجل ...

و انتخبت عشان دم الشهداء يرجع حقه ..اصل افضل واحد عنده خبرة بالبلد و دهاليزه و يعرف يرجعلهم حقهم ..الي شارك في قتلهم

و ابقى ابعت ورد لأبو كريم بنونه ع الماشي كدا عشان جاتله ازمة قلبية ...الله يخليك

و برقية لصديقتي "......." الي كانت عزيزقوم ذل ..بعد ما ضربوا زوجها في ظهره بالرصاص الحي وبقى قعيد في المستشفى مكتئب متألم , هوه في محافظة و هيه في محافظة لغاية دلوقتي ..عشان مايقدرش مادياً يتعالج في البيت .

و مااتكلمنيش بقه بالدين و تقولي ربنا ...يعني هذه الأمور اللوجستية البرجوازية الادارية الفنية الخبراواتيه الدنيوية الفركفروتية المدهلوه الولية ....يعني كلها امور ملهاش دعوة بالدين ..انت رشقه في كل حاجه؟؟

بس طبعا فيها الضميييير... و الي يتزنق يرجع للتاريخ علطول

طيب و ايش ضمنا أن الاخوان مش هيعملوا كووول دا؟؟ ....على رأيك ...خلينا ف منطقة الراحة ..و الي تعرفوا والي جربتوا أحسن من الي ماجربتوش ...مش دا علام المدارس بتاعنا ؟؟

يعني شايفين نفسهم و عندهم اعلام مايعلم بيه الي ربنا و قالوا وعود و عملوا عكسها و طلعوا من الكهف ضرب النور في عنيهم و ادربكوا ...حاجات كتير برضو.

أيها السادة .. القادة ..

دا مش مر و أمر منه لأن الاتنين كدا في دايره واحده ..دا مش سئ و اسوأ منه لأن الاتنين في دايره واحده.

شتان ما بين خير بيلبخ و بيقع و يقوم ..و الشر المدمر الممنهج الي سرق انسانيتي قسرا و قصدا مع سبق الأصرار و الترصد.

قلبي تعب و معلش مش قادره اكمل ...

نظام غدر و فجر..

و لم يترك حاجة و لا داجة إلا اقتطفها بيديه.

نظام قتل و سرق...

واغتصب و نهب ...

و تعجرف و ظن أنه حي للأبد..

و خطف انسانيتي أمام عيني...

كمصرية ..و كامرأة

لا يمكن أن أدنس يدي باختيارشخص انتمى له يوما ...

فما بال بانتمائه له كل حياته ..

و أختم بمقولة مشهورة لأحد قيادات الحزب البائد ..والذي قالها يوما لي :

"يا مودام محدش فينا نضيف"


ان عز اخاك فهن


من خان حى على الفلاح خان حى على الجهاد




الأمة التي تفرط في الفجر في جماعة أمة لاتستحق القيام بل تستحق الأستبدال وعلى الجانب الأخر الأمة التي تحرص على صلاة الفجر في جماعة أمة اقترب ميعاد تمكينها في الأرض د/ راغب السرجاني



حماس يانور العين

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
salah
عضو متقدم
عضو متقدم
avatar

تاريخ التسجيل : 07/03/2011
عدد المساهمات : 989
التقييم : 10
الأوسمة : :

مُساهمةموضوع: رد: هو مين دول اللي زي بعض ؟؟!!   الثلاثاء مايو 29, 2012 1:15 pm


مين اللي بيقول كدا ؟؟؟؟؟؟؟؟؟؟؟؟؟؟؟

دول مجانين اللي بيقولو كدا ............ اية اللي جاب القلعة جنب البحر .


الشعب المصري يا يبهرك ..........يا يقهرك .

يا يشيلك علي رأسة.......... يا يشيلك رأسك .

شعب تايه يا ولاد الحلال .

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
محمد سليمان
مشرف الركن الأدبى
مشرف الركن الأدبى


تاريخ التسجيل : 07/03/2011
عدد المساهمات : 1251
التقييم : 25
الأوسمة : :

مُساهمةموضوع: رد: هو مين دول اللي زي بعض ؟؟!!   الإثنين يونيو 04, 2012 2:02 am

طبعا زي بعض بدليل لو جمعت الاثنين يعطوك صفر فخطايا شفيق تكفرها مزايا مرسي مش قلت لك.....


التـــــوقيـــــــــــــــــــع
سُـبـحـانَـكَ الـلَهُمَّ خَير مُعَلِّمٍ 000 عَـلَّـمـتَ بِـالقَلَمِ القُرونَ الأولى أَخـرَجـتَ هَذا العَقلَ مِن ظُلُماتِهِ 000 وَهَـدَيـتَـهُ الـنـورَ المُبينَ سَبيلا أَرسَـلـتَ بِالتَوراةِ موسى مُرشِداً 000 وَاِبـنَ الـبَـتـولِ فَـعَلَّمَ الإِنجيلا وَفَـجَـرتَ يَـنبوعَ البَيانِ مُحَمَّداً 000 فَـسَـقـى الحَديثَ وَناوَلَ التَنزيلا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
هو مين دول اللي زي بعض ؟؟!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
telbana4all :: قسم الحوارات والنقاشات الجادة :: خمسة سياسة-
انتقل الى: